ফটাঢোল

পঞ্চপদী – হেমেন ডেকা

(১)

তুমিয়েই মাই-বাপ, তুমিয়েই অগতিৰ গতি

তুমিয়েই ৰাখিবা আমাৰ জাতি-মাটি আৰু ভেটি

আমি তোমাৰ ভক্ত-চেলা

নুবুজোঁ ছলনাৰ খেলা

তোমাৰ আশ্বাসতে অভিভূত হৈ থাকোঁ দিন-ৰাতি৷

(২)

নিবনুৱাক লৈ চলি থাকে ৰাজনীতি

তেওঁবিলাক যেন পাশাখেলৰ গুটি

নেতাৰ প্ৰলোভন

দেখুৱায় সপোন

শেষ ফল হয়গৈ মাথোন এটি ঘটি!

(৩)

মুখত তোমাৰ ফুল-চন্দন পৰক- হে মহান

আমাৰ হিয়াৰ আমঠু- ৰাখিছা গামোচাৰ মান

জনতাৰ বুকুৰ আপোন নেতা

নাভাবোঁ যে তোমাক আপোন-পেটা

তোমাৰ প্ৰতিশ্ৰুতি যেন এন্দুৰৰ গাঁতৰ ধান৷

(৪)

ভাবোঁ ক’তনো দগৰি এসাজ খাবলৈ পাওঁ

বিনামূলীয়া খানা হ’লে দৌৰাদৌৰিকৈ যাওঁ

ভোজলৈ যাব লাগে আগত

মেলত একেবাৰে পিছত

খোৱাটো মুখ্য- তাৰ বাদে একো ভু-ভা নাপাওঁ৷

(৫)

নিজকে ভাবে তেৰাই বিয়াগোম পণ্ডিত

উঠা-বহা কৰে সদায় অভিজাত গণ্ডিত

দিয়ে পৰিচয় সমাজকৰ্মী কথা-

কাম বিপৰীতধৰ্মী

কথাৰে অসুৰক কৰিব খোজে ভূলুণ্ঠিত৷

(৬)

ৰাস্তাই-ঘাটে চিঞৰি জনাওঁ প্ৰতিবাদ

ৰাইজক আভুৱা ভাৰাসৱ মুৰ্দাবাদ

আমি সদাজাগ্ৰত প্ৰহৰী

উত্তাল কৰোঁ গাঁও-নগৰী

আমাৰ আন্দোলন বাৰমাহেই জিন্দাবাদ৷

(৭)

সোণৰ অসম এইবাৰ নিশ্চয়কৈ হ’ব

ডাল-ধদুৱায়ো কৰ্মসংস্থাপন পাব

আৰু নকৰোঁ আমদানি

পাতিম অলেখ কোম্পানী

নোৱাৰিলে ৰাজনীতি এৰিম- ভোটটো দিব!

☆★☆★☆

2 Comments

Leave a Reply

Your email address will not be published.