ফটাঢোল

প্ৰজন্ম – বৈদুৰ্য্য বৰুৱা

: যুগৰ বহুত পৰিৱৰ্তন হ’ল দাদা কি কয়?

: আৰু কি…!

বাসুৰ কথাত হয়ভৰ দিলোঁ।

: মোৰ পাঁচ বছৰীয়া ল’ৰাটোৱেও যি মবাইল চলাই নহয়! মইতো দাদা আচৰিত! বিশ্বাস কৰক ইউটিউব চিউটিউব মই চিনিয়েই নাপাওঁ! সি উলিয়াই চাব জানে৷

: আজিকালি জন্ম হৈয়েই সকলো ল’ৰা ছোৱালীয়ে এইবোৰ চলাব জানে৷ একেবাৰে কমন কথা৷

: আপুনি জানেনে দাদা?

: এই অলপ চলপ ফে’চবুক, হোৱাটচ এপ…

: আপোনাৰ দেউতাই চাগৈ সেইবোৰ একোকে নাজানে….

: না সেই পুৰণা নকীয়াটোকে চলাব নিশিকিলে আজিলৈকে। কিন্তু বাসু আজি হঠাতে তোৰ এনেকুৱা ধৰণৰ প্ৰশ্ন?

মই তাক সুধিলোঁ। আচলতে তাৰ প্ৰশ্নবোৰত কিছু আচৰিতো হৈছিলোঁ।

: এঃ! দাদা এনেয়ে জানিবৰ মন গৈছে৷ আৎসা দাদা এতিয়া ধমেন্দ্ৰ, হেমামালিনী, দেৱানন্দৰ চিনেমা চলিবনে?

: নচলিব চাগে৷ ধমেন্দ্ৰ বাদ দে, চানী দেউলৰ টাইমেই শেষ৷ সেই যুগ গ’ল আৰু৷ সেইসকলক নতুন জেনেৰেচনে চিনিয়েই নাপায়; আৰু সঁচা কথা ক’বলৈ গ’লে চিনি পালেও তেওঁলোকৰ চিনেমা চালেও মুখখন বিকতাই দিয়ে৷ এনেকুৱাও আৰু চিনেমা থাকেনে৷

: কিন্তু তেওঁলোকক সেইবুলি সকলোৱে মনতো ৰাখিব; উপযুক্ত সন্মানো দিব; কিন্তু তেওঁলোকৰ দিন গ’ল নহয়নে?

: একদম সঁচা কথা৷ তেওঁলোকেও কথাতো বুজি কিন্তু এতিয়া চিনেমাৰ হি’ৰৰ ৰোল তেওঁলোকেও নলয়৷ ৰাজদূত মটৰ চাইকেল এতিয়াও ৰাস্তাত দেখিছেনে?

: নাই নাই সেইবোৰ আৰু এতিয়া ক’ত দেখিম৷ এতিয়াতো কেনেকুৱা কেনেকুৱা লেটেষ্ট মডেলৰ বাইক ওলাই গ’ল৷ ফাঁই..ফাঁই…

: ৰাজদূত মটৰ চাইকেল এতিয়া কোনোবাই কিনিবনে?

: কোন মূৰ্খই কিনিব অ’? কিন্তু বাসু তই এইবোৰ কি অবলং টাইপ প্ৰশ্ন কৰি আছ মই বুজা নাই৷

: বুজিব ৰ’ব৷ আজিকালি চিনেমা, নাটক, শিল্প, সাহিত্য, ৰাজনীতি, সকলোতে নতুন মুখ, নতুন প্ৰতিভা, নতুন টেকন’লজি, নতুন ডেকা তেজৰ পয়োভৰেই দেখা পাব আপুনি। ৰাজনৈতিক দলবোৰতো দেখিব নতুন ডেকা তেজৰ দপদপনি৷ নতুন চিন্তা নতুন প্ৰজন্মৰ পচন্দৰ নতুন নেতা৷

: বাসু তই আচল কথাটো কচোন৷

একপ্ৰকাৰ খঙেৰেই তাক ক’লোঁ।

: কৈছোঁ ৰ’ব। সেইদিনা এখন ঘৰত সোমাই এটা দৃশ্য দেখি বৰ ভাল লাগিল।

: কি দৃশ্য?

: পুত্ৰসকলে বাপেকৰ পুৰণি ৰাজদূত মটৰচাইকেলখন সজাই পৰাই সযতনে স্মৃতি হিচাবে থৈ দিছে। কাষত ৰাজেশ খান্না, দেৱানন্দৰ ফটোও ওলোমাই থোৱা আছে৷

: তাতেনো কি হ’ল?

: আজি ৰাস্তাত আৰু এটা দৃশ্য দেখি বুকুখন ফুলি গ’ল। ভাল লাগে৷ গৰ্বিত হৈ পৰোঁ৷ এতিয়াও হাৰ নমনা ধমেন্দ্ৰক দেখিলে কাৰনো ভাল নালাগিব দাদা৷

: আৰে ভাই আচল কথাটো ক৷

: এজন বৃদ্ধক ৰাজদূত এখনেৰে সৈতে দেখিলোঁঁ৷

: আৎসা!

: ৰচী এদালেৰে আন এখন চিকমিকিয়া নতুন বাইকেৰে টানি নি আছে৷

: তাতেনো কি হ’ল?

: কিবা আঞ্চলিক আঞ্চলিক ফিল এটা হ’ল দাদা!

বাসুৱে কৈ উঠিল।

☆★☆★☆

2 Comments

Leave a Reply

Your email address will not be published.