ফটাঢোল

পঞ্চপদী পদ্য- হেমেন ডেকা

                     (১)

উজানৰ মাছ দেখিবলৈ অৱশ্যে শুৱনি

অলপ পানীতে দেখুৱায় বহু চটফটনি!
         উঠি আহে জাক পাতি
           উৎসাহৰ পৰে ইতি
শ’লঠেকত পৰিলে হেৰাই যায় তৰ্ধনি৷

                    (২)

ৰৌ-বৰালিয়ে খালে-বিলে কৰে বৰষা-নৃত্য
পুঠিমাছে বোলে আমিও নহয় কাৰো ভৃত্য
              নাচিম, নকৰোঁ ভয়
               হ’বই আমাৰ জয়
ৰাঘ-বৰালিৰ খেদাত দিবাস্বপ্নৰ অন্ত৷

                     (৩)

বোকাত লুকুৱা স্বভাৱ শিঙিৰ পুৰাতন
পানী সিঁচিলেও সেয়ে সহজতে ধৰা টান
            ধৰিলেও যায় পিচলি
             বিন্ধাই দিয়ে আঙুলি
মাছমৰীয়াই সোঁৱৰে ত্ৰাহি মধুসূদন৷

                     (৪)

ঘনঘোৰ তমসা নাশিম, আনিম পূৰ্ণিমাৰ জোনাক মাতি
যুদ্ধজয়ৰ পাছত ফুলেৰে সজাম শ্বহীদৰ প্ৰতিমূৰ্তি
        মনৰ দাপোণত বিষ্ণু ৰাভা
        মুখৰ কৰোঁ নিৰ্বাচনী সভা
ক্ষমতালৈ যদি আহোঁ দিনেই হৈ থাকিব, নহয় আৰু ৰাতি৷

                     (৫)

নিৰ্বাচনৰ আগতে কৈছিল, ইয়াতে পাতিব ব্যৱসায়ৰ ঘাটি
বিদেশীলৈ ৰপ্তানি হ’ব ফচল, কৃষকে বিধে বিধে কৰিব খেতি
            অঞ্চলটো হ’ব নদন-বদন
          সকলোৰে হাতলৈ আহিব ধন
পিচে গাদী পাই পাহৰিলে, ফুটুকাৰ ফেনসোপা হ’ল প্ৰতিশ্ৰুতি৷

                   (৬)

খোজ দিয়ে হালি-জালি, মুখত থাকে গুৱাল-গালি
কথাৰ খেলিমেলি, সিবিধ খায় গধূলি গধূলি
                মন যেন মকৰাজাল
                দেহটো কটাৰীৰ নাল
ৰাস্তাই-ঘাটে পৰি থাকে, যেন তলসৰা শেৱালি

☆ ★ ☆ ★ ☆

Leave a Reply

Your email address will not be published.