ফটাঢোল

মাংস খাই মই কিয় বেয়া পাওঁ -জয়ন্ত দত্ত

: ভাইটি, মাংস কেনেকৈ দিছা?

: ল’কেল চাৰিছ, খাছী চাতছ।

: ল’কেল মানে মূৰ্গীৰ কথা ক’লানে কি!

: হয় দাদা।

: অহ্

: কিমান দিম দাদা? এই ছোটু, ভাল চাইকেনে ল’কেল এটা উঠাই দে দাদাক।

: হেহ্ ৰ’বাহে এটা মূৰ্গী…! আমি মানুহ দুটাহে।

: সৰু চাই ল’ক এটা। ছোটু সৰু চাইকেনে… ।

: নহয় মানে আমাৰ এওঁ ল’কেল মূৰ্গী বৰ এটা ভাল নাপায়। মাংসবিলাকো সৰু সৰু, চোবাবলৈ ঠায়েই নোলায়।

: তা হ’লে আপনি খাছী লৈ ল’ক আধাকিলো। ছোটু…

: হেই নালাগে নালাগে, আধাকিলো মাংস কোনে খাব!

: কিমান দিম ক’ক।

: কেজি সাতশ হ’লে, এশ গ্ৰামত হ’ব… ! নহয় মানে এনেয়ে হিচাপটো কৰিছোঁহে দেই।

: আৰে দাদা দামতো হ’ব, অলপ কমাই কেনে ধৰিম য’ক।

: এহ্ ছাগলীৰ মাংস বৰ টান হে, সিজোঁতে বহুত সময় লাগে।

: মাংছ কমপ্লেন নাপাব দাদা, একদম কালা খাছী আছে।

: সোৱাদতো ছালৰ ৰঙটোত লাগি থাকেনে কি! হিঃ হিঃ…

: আৰে জলদি ক’ক দাদা, এইফালে কাষ্টমাৰ লাগি আছেত’। ছোটু, বাইদ’ৰ লেগ পিছ দুটা ডাঙৰকে কাটি দে।

: পঞ্চাশ টকা মানত এশ গ্ৰাম নাহিব নেকি হে!

: ধামালি কিয় কৰিছে দাদা?

: এহ্ ধেমালি কৰা নাই ৰ’বা, বাকী বজাৰৰ কথা চিন্তা কৰিছোঁ।

: দাদা আপনি বইলাৰ লৈ য’ক। কমতে হ’ব, খায়ো ভাল পাব।

: অ’, ব্ৰইলাৰ হ’লেও বেয়া নহয় অৱশ্যে, কেনেকৈ দিছা?

: গোটা দেৰছ, কাটা দুছ।

: হে হেৰি নহয়, বিশ টকামানৰ দিয়া তেনেহ’লে।

: কি কৈ আছে দাদা, একছৰ দাগা নাইত’।

: হ’ব দিয়া, ৰাণটোকে কাটি দিয়া গোটেইটো। অলপ কম হ’লেও হ’ব আৰু, মই ইমান লাগি থকা মানুহ নহয়। 

: ধুৰ, আপনি মোৰপৰাই দছ টাকা লৈ ল’ক, যোগেচৰ দুকানত যাইকেনে কণী দুটা লৈ ঘৰত য’ক, বেকাৰ টাইম নষ্ট কৰি নাথাকক।

: অ’ হয় নেকি, তেতিয়াহ’লে বিশ টকা কৰি দিয়া, পিয়াঁজ পঞ্চাশ গ্ৰামো লৈ যাব পাৰিম একেলগে।

☆ ★ ☆ ★ ☆

One comment

  • বন্দিতা জৈন

    ????কি কম আৰু। ভাষা নাই

    Reply

Leave a Reply to বন্দিতা জৈন Cancel reply

Your email address will not be published. Required fields are marked *