পঞ্চপদী পদ্য-হেমেন ডেকা
(১)
সৰলভাৱে কাকনো ভাবিছিলোঁ সহোদৰ
ভালকৈ চিনিলোঁ তেৰা বদনৰে বংশধৰ
চকুত ঐতিহাসিক ঘৃণা
আপোন পাহৰা দিনকণা
পৰৰ গোলাম হৈ মাৰে দম্ভালি হাস্যকৰ৷
(২)
পিন্ধে জাতীয়তাবাদীৰ মুখা
বুকুত জাত্যভিমানৰ পোখা
মুখত শ্লোগান
মিছা অভিমান
জাতি ৰক্ষক বহু শূৰ্পণখা৷
(৩)
আন্তঃআঞ্চলিক বিদ্বেষৰ হোতা
দেখুৱায় নিজকে জাতিৰ নেতা
কণ্ঠত সুৰীয়া আহ্বান
একতাৰ কি ভেশচন
দেখি-শুনি অতিষ্ঠ দৰ্শক-শ্ৰোতা৷
(৪)
আচলতে প্ৰতিশ্ৰুতি সৱ মিছা
ক্ষমতা লালসাই কেৱল সঁচা
বহুতেই বুজি পায়
নীৰৱে মাথোন ৰয়
ভিতৰতেচোন চলে হনা-খোঁচা!
(৫)
জাতি-জনগোষ্ঠীৰ গঢ়িব সম্প্ৰীতি
খহনীয়াৰপৰা ৰাখিব ভেটি-মাটি
মনত অলীক সপোন
চকুত ঘৃণাৰ নাচোন
সুবিধাবাদী হৈ মাৰে ইলুটি-সিলুটি৷
(৬)
দেখাত চমৎকাৰ, কি সুন্দৰ মায়াজাল
একতাৰ ভগাঢোল বজায় তেৰাই ভাল
শেন চৰাইৰ দৃষ্টি
দলৰ বাবেই সৃষ্টি
সাজু বাহুবল, দিশহাৰা নিবনুৱা দল৷
(৭)
বৰ ভাল পাওঁ খাই ভোজ-ভাত
অইনৰ বাবেহে নোলায় মাত
কোনোবাই পোৱা নাই
আমাৰ কি আহে যায়
মাতিম কেনেকৈ- নিমিলে যে জাত!
(৮)
সকলোতে প্ৰায় একেই নাটক
নাটকৰ কথাকে পাতোঁ দিয়ক
নাটক চলিছে ভাল
মঞ্চত কি তালফাল!
সানন্দে কৰোঁ উপভোগ- আহক৷
☆ ★ ☆ ★ ☆
1:10 am
আপোনাৰ পঞ্চ পদী পদ্য সমূহ আলোচনীৰ সদায়ে গৌৰৱ
10:11 am
অশেষ ধন্যবাদ৷
10:14 am
ভাল লাগিল কবিতাটো
9:19 pm
ধন্যবাদ জ্ঞাপন কৰিলোঁ৷
11:57 am
বৰ ভাল পালোঁ৷
9:21 pm
ধন্যবাদ জ্ঞাপন কৰিলোঁ৷
12:29 pm
অনুপম।মন মগজুক খুণ্ডিয়াই যোৱা শব্দবোৰ।
9:24 pm
অশেষ ধন্যবাদ৷
4:02 pm
ভাল লাগিল৷
9:25 pm
ধন্যবাদ৷