যাৰ মই মোমায়েক (মূল: শৰদ যোশী) – অনুবাদ: মিতালী নাৰায়ণি

এগৰাকী ভদ্ৰলোক বাৰানসী পালেগৈ। ষ্টেচনত নমাৰ লগে লগে ল’ৰা এজন তেওঁৰ ফালে দৌৰি আহিল।

“মোমাইদেউ! মোমাইদেউ!” বুলি ল’ৰাজনে পলকতে মানুহজনৰ ভৰি চুই সেৱা কৰিলে।

ল’ৰাজনক ভদ্ৰলোকে চিনি নাপাই সুধিলে, “তুমি কোন?”

“মই মুন্না। আপুনি মোক চিনি পোৱা নাই নেকি?”

“মুন্না?” ভদ্ৰলোকে মনত পেলাবলৈ চেষ্টা কৰিলে।

“হয় হয়, মুন্না। আপুনি মোক পাহৰি গ’ল মোমাইদেউ! অৱশ্যে এয়া ইমান অস্বাভাৱিকো নহয়, লগ পোৱাৰো বহুবছৰ হ’ল নহয়!”

“পিচে, তুমি ইয়াত যে? কেনেকৈ?”

“মইতো আজিকালি ইয়াতে থাকোঁ।”

“অ’, হয় নেকি!”

“হয়।”

মোমায়েকে তেওঁৰ ভাগিনীয়েকৰ লগত বাৰানসী ফুৰিবলৈ আৰম্ভ কৰিলে। বৰ ভাল হ’ল, অন্ততঃ সংগী এটা যে পালে! কেতিয়াবা এইটো মন্দিৰ, কেতিয়াবা আন এটা মন্দিৰ – এনেকৈ দুয়ো বাৰানসীত ঘূৰি ফুৰিলে।

ঘূৰি-ফুৰি গংগাৰ ঘাটত উপস্থিত হ’লগৈ। মোমায়েকে ভাবিলে, গংগাস্নান কৰা হওক!

“মুন্না, গাটোকে তিয়াই লওঁ, নে কি!”

“নিশ্চয় মোমাইদেউ! বাৰানসীলৈ আহি গংগাস্নান নকৰিলে কেনেকৈ হ’ব?”

মোমায়েকে গংগাত ডুব মাৰিলে “হৰ হৰ গংগে!”

পাৰলৈ উঠি আহি দেখে যে তেওঁৰ বয়-বস্তু, কাপোৰ-কানি সকলো অন্তৰ্দ্ধান। সেই ল’ৰাটো… মুন্না- সিও অন্তৰ্দ্ধান!

“মুন্না… অ’ মুন্না!”

কিন্তু মুন্না তাত থাকিলেহে মুন্নাক পাব। ভদ্ৰলোকে টাৱেলখন মেৰিয়াই ৰৈ থাকিল।

“হেৰি মহাশয়, শুনকচোন! আপুনি মুন্নাক দেখিছে নেকি?”

“কোন মুন্না?”

“সিয়ে যাৰ মই মোমায়েক হওঁ।”

“মই বুজা নাই।”

“এহ্, মই যাৰ মোমায়েক সেই মুন্না আকৌ!”

তেওঁ টাৱেলখন মেৰিয়াই মুন্নাক বিচাৰি ইফালে সিফালে দৌৰি থাকিল। কিন্তু মুন্নাক বিচাৰি নাপালে।

ভাৰতীয় নাগৰিক আৰু ভাৰতীয় ভোটদাতা হিচাপে বৰ্তমান আমাৰো এয়ে দশা, বন্ধুসকল! নিৰ্বাচনীৰ বতৰত কোনোবা আহে আৰু আহিয়ে আমাৰ ভৰিত বাগৰি পৰে। “মোক চিনি পোৱা নাই নেকি! মই নিৰ্বাচন প্ৰাৰ্থী। হ’বলগীয়া এম.পি। মোক চিনি পোৱা নাই?” আপুনি গণতন্ত্ৰৰ গংগাত ডুব মাৰিব। বাহিৰলৈ ওলাই আহি দেখিব যে কালি আপোনাৰ ভৰি চুই সেৱা কৰাজন আপোনাৰ ভোট লৈ অন্ধৰ্দ্ধান হৈ গৈছে; ভোটৰ আটাইবোৰ বাকচ লৈ তেওঁ নাইকিয়া হৈ গৈছে।

ইফালে সমস্যাৰে ভৰা ঘাটটোত আমি টাৱেলখন মেৰিয়াই ৰৈ থাকোঁ। সকলোকে সুধি ফুৰোঁ, “হেৰি, তেওঁক ক’ৰবাত দেখিছে নেকি? এহ্ যাক আমি ভোট দিছিলোঁ তেওঁৰ কথাকে কৈছোঁহে। তেৱেঁইহে, যাৰ আমি মোমায়েক।”

আৰু এইদৰে টাৱেল মেৰিয়াই ঘাটত ৰৈ থাকোঁতেই পাঁচ বছৰ পাৰ হৈ যায়।

☆ ★ ☆ ★ ☆