ফটাঢোল

পঞ্চপদী – হেমেন ডেকা

(১)
এই জীৱনটো জানো আকৌ পাম
সেয়ে যিমান পাৰোঁ দগৰি খাম
সজাম অট্টালিকা
ৰচিম প্ৰহেলিকা
ক’লাধনেৰে চমক দি থৈ যাম৷

(২)
বস্তুবাদী জগতৰ বাবে পৰম আশ্চৰ্য
মানৱীয় প্ৰমূল্যবোধে জীৱনৰ ঐশ্বৰ্য
পঢ়াশালিৰ পণ্ডিত
নাথাকে ঠেক গণ্ডীত
অসীম যন্ত্ৰণাতো মুখত হাঁহি অনিবাৰ্য৷

(৩)
ৰাজনীতিকৰ পদূলিত কৰে তাঁত-বাতি
সমাজ গঢ়া কাৰিকৰৰ এয়া কেনে নীতি
উচ্চাকাংক্ষী পণ্ডিত
কাৰনো সাধিব হিত
বুজিবই নোৱাৰি মহাশয়ৰ মতি-গতি৷

(৪)
গণ্ডাই গণ্ডাই দল ওলাইছে মাটি ফুটি
ইটিৰ লগত সিটিৰ নহয় মাতা-মাতি
নিজা নিজা ইস্তাহাৰ
অহমিকা বৰ চাৰ
গাদীৰ স্বপ্নত বিভোৰ, মন উজান ভাটী৷

(৫)
জীৱিকাৰ বাটত ক’ৰোনাই মাৰিলে গঁতা
চিৎভোলোঙা খাই দেখোঁ কপালতে ফুটা
কি দিন-কাল আহিল
অৱস্থা হ’ল কাহিল
সাতে পাঁচে মিলি ভেটিত গজিল বেং-ছতা৷

(৬)
ৰাইজৰ মূৰত কঁঠাল ভাঙে
নেতা হোৱাৰ বুধি মনত পাঙে
গলত গামোচা
লগত চামচা
চান্দা তুলিবলৈ যায় ৰংমনে৷

(৭)
বেছি আশা নকৰাই হ’ব ভাল
ধৰিবই নোৱাৰি নেতাৰ চাল
ভৱিষ্যত নাই
বৰ্তমান ছাঁই
শান্তি পাবলৈ খাওঁ জুলীয়া মাল৷

(৮)
বাহটো ৰাখিবলৈ তৎপৰ আমি এজাক কোদো
অগ্নিবৰষা কণ্ঠত আমাৰ সন্মোহনী যাদু
এইবাৰহে এইবাৰ
কৰিমেই জাতি উদ্ধাৰ
একতা নাথাকিলেও নহয় কিন্তু এলাইবাদু৷

(৯)
লকডাউন আঁতৰি গৈছে লাহে লাহে
ক’ৰোনা সোমাল এতিয়াহে আঁহে আঁহে
ভূত নে ই পিশাচ
কি পৈশাচিক নাচ
কিছুমানে আকৌ নাটক বুলি কৈ হাঁহে৷

(১০)
জীৱন এক প্ৰহেলিকা নতুবা মহাশূণ্য
জাগতিক সকলোবোৰেই আজি দেখোঁ পণ্য
লগত কিনো লৈ যাম?
অনিবাৰ্য ৰামনাম
ইহ-জগতত পৰুৱাৰ জীৱনেই ধন্য৷

*****

3 Comments

Leave a Reply

Your email address will not be published.