ফটাঢোল

পঞ্চপদী- হেমেন ডেকা

                      (১)

ফে’চবুকো যে কেনে এক বিচিত্ৰ জগত

আমিও তাৰে বাসিন্দা, যেন হৰিভকত

আছে ইয়াৰ গৰিমা

বন্ধুৰো দেখোঁ মহিমা

কাজিয়া কৰিলেহে বেজাৰ লাগে মনত৷

                     (২)

বেসুৰা জীৱনৰ গান, নাই যে সুৰৰ মূৰ্ছনা

মষিমূৰ কত সপোন, নিৰাশাই আঁকে আল্পনা

ভাগৰুৱা দেহ-মন

চৌদিশে গহন বন

বাঘৰ পেটত সোমাল নেকি আশা আৰু কল্পনা?

                      (৩)

ক্ষমতাই য’ত মূলমন্ত্ৰ

সকলোতে চলে ধনতন্ত্ৰ

দুৰ্বল জনতা

বেপাৰী বিধাতা

ধন্য ধন্য প্ৰশাসন যন্ত্ৰ৷

                      (৪)

অপদাৰ্থক দিওঁ নেতৃত্ব সঁপি

দুৰ্দশাক মানি লওঁ বিধিলিপি

প্ৰতিশ্ৰুতিত ভোল যাওঁ

মিছা আশাত মজি ৰওঁ

গধূলি গধূলি খাওঁ সেইটুপি৷

                      (৫)

অতীতক পাহৰি যোৱাই চাগৈ ভাল

মিছাতে কিয় বাৰু লগাওঁ তালফাল

বৈ যায় সময় নৈ

কৰিলোঁ কত হৈ-চৈ

এতিয়াহে বুজিলোঁ আমি যে পঁচা মাল৷

                      (৬)

পূৰ্বপুৰুষে শৰাইঘাটত শত্ৰুক নিছিল মহটিয়াই

এতিয়া উত্তৰপুৰুষক দেখোন যিয়ে-তিয়ে আহি কিলাই

খাৰখোৱা আমি খিলঞ্জীয়া

স্বাভিমান প্ৰায় নাইকিয়া

আগ্ৰাসনকাৰীৰে হিয়া দিয়া নিয়া কৰি হ’ল কেনে বিলাই!

☆ ★ ☆ ★ ☆

One comment

Leave a Reply

Your email address will not be published.