ফটাঢোল

পূজা ২০২০ : নীলাঞ্জনা মহন্ত

আজি বোলে দেওবাৰ, উঠি খালোঁ জলপান
উঠা দেৰি হ’ল বাবে নবজাতহে ‘all done’৷

পূজাৰ বতৰ দোকানেৰে ভৰি থাকিব ৰাস্তা
মায়ে বোলে পুৱাই গৈ আন আলু এবস্তা৷

দেওবৰীয়া হাটত চাগে মানুহে আছে ভৰি
মুখা আৰু হাতমোজা লৈ যাবি নেপাহৰি৷

পূজা বুলি ভনীয়েৰলৈ আনিবি এটা ঘড়ী
ঘৰতে থাকি মহাৰাণীৰ দিন-ৰাতিৰ হ’ল খিচিৰি৷

ফেচবুক আৰু হোৱাটচাপেই ৰাণীৰ হৈছে জীৱন
পাৰিলে সেই দুটা বস্তুৰ যেন কৰিব মাই মুণ্ডন৷

মাই বোলে উঠ মহাৰাণী বেলহিচোন লুচি
আলু আহি পালেই ভাজিবি লগাই ৰুচি৷

বকনি নেওচি মই মুখাপিন্ধা ওলালোঁ লৈ মোনা
ৰাস্তা দেখোন খালী, বন্ধ দিয়াও নাই শুনা৷

দুই এজন লাহে ধীৰে পালোঁ মুখাপিন্ধা
সকলোৱে মুখাপিন্ধা নিয়ম যে ধৰাবন্ধা৷

তিনিআলিৰ মূৰত দেখোঁ এক ভীমহেন ট্ৰাক
নমাই আছে এপদ দুপদকৈ পাচলি আৰু শাক৷

দুই এক মুখাপিন্ধাই টোপোলা আছে যাচি
আন দুকুৰিমানে তাৰেপৰাই লৈ আছে বাচি৷

দামবোৰো আছে লিখা প্ৰকাণ্ড ক’লা আখৰত
আঙুলি টোঁৱাই লগাটো জনাই পইচা লৈ হাতত৷

মানুহবোৰ থিয়ৈ থিয়ৈ টোপনি গ’ল যেন পাওঁ
অমুকাই ভাবিলোঁ কি লাগে মুখেৰেই কওঁ৷

হেৰি মুখাপিন্ধা, আলু দুকিলোমান দিবচোন
মুখাপিন্ধাই আচৰিত হয় এইটো ওলাল কোন!

মুখাৰ ভিতৰত নাপায়হে গম হাঁহি আছোঁ মিচিকি
বেপাৰীজন দেখোন কিবা এটা লাগিছে চিনাকি৷

ঐ মুখাপিন্ধা তই আমাৰ লগৰ ভবেনচোন
মুখাপিন্ধাই বোলে হয় বাৰু পিছত কৰিবি ফোন৷

আলু যাচি ক’লে সি চাকৰিটো বোলে গ’ল
বেপাৰ কৰি আছোঁ খাই বাৰু যি হ’ল হ’ল৷

কোম্পানীয়ে খেদিলে বোলে লকডাউনৰ পিছত
অসমীয়া বেপাৰী মই চেলেঞ্জ ল’লোঁ হাতত৷

কোম্পানীয়ে দিয়াতকে দুটকা বেছিকৈহে পাওঁ
নিজৰ খাই এতিয়া আন দহজনকো খুৱাওঁ৷

মই বোলো আও তই তলে দেখোন ওলালি পুতল
আবেলি মাৰিবিচোন এপাক লুচি খুৱাম ব’ল৷

মুখাপিন্ধা বেপাৰীয়েও হ’ল লগতেই মান্তি
ভবেনৰ আদৰ্শই মোক দিলে বিৰল শান্তি৷

☆★☆★☆

7 Comments

  • বন্দিতা

    বঢ়িয়া লাগিল

    Reply
  • - Jogesh Bhattacharyya

    সুন্দৰ পদ্যটিৰে আলোচনীখন টনকীয়াল কৰা বাবে আপোনাক ধন্যবাদ জনালো।

    Reply
  • জিতু

    ভাল লাগিল

    Reply
  • হেমন্ত কাকতি

    মজা কবিতা নীলাঞ্জনা৷

    Reply
  • কাবেৰী মহন্ত

    ৱাহ! সাংঘাতিক লিখিছ৷

    Reply
  • মন্দিৰা

    বৰ ভাল লাগিল ।

    Reply
  • ৰঞ্জিত কুমাৰ শৰ্মা৷

    কবিতা পঢ়ি লাগিল বৰ মজা
    আমিও খাম লুচি আৰু আলু ভজা!

    Reply

Leave a Reply

Your email address will not be published.