দুটা কণমানি গল্প : আদিত্যজ্যোতি বৰঠাকুৰ

ৰমণী ‘চেল্ফড এম্পলয়ড’৷ বুদ্ধিত বৃহস্পতি, অতি সিয়ান ৰমণীৰ কামৰ অভাৱ নাই৷ পঢ়া শুনাৰ ক্ষেত্ৰত বৰ বেছি মাথা মাৰি ভাল চাকৰি বাকৰি এটা কৰাৰ ধাণ্ডাত নথকা ৰমণীৰ আৰ্থিক অৱস্থা আন দহটা ডেকা ল’ৰাতকৈ ভাল৷ তাৰ বাবে উপাৰ্জনটোৱেই মূল কথা৷

এইহেন বিহুৱে তালৈ লৈ অনা উপাৰ্জনৰ সুবৰ্ণ সুযোগ সি হেৰুৱাব নোৱাৰে৷ এইবেলি বিহুত গাঁৱৰ ল’ৰা ছোৱালী এজাক গোটাই চহৰত হুঁচৰি মৰাৰ পৰিকল্পনা ৰমণীৰ৷ চহৰৰ নিৰ্বাচিত কিছুলোকৰ ঘৰলৈহে হুঁচৰিৰ দল লৈ যাব ৰমণীয়ে৷ হুঁচৰিৰ দলৰ প্ৰস্তুতি তুংগত…ৰমণীয়েও নিজৰ প্ৰস্তুতি সম্পূৰ্ণ কৰি তুলিছে৷ তাৰ নিৰ্বাচনত উঠা মানুহৰ ঘৰে ঘৰে ৰমণীয়ে হুঁচৰিৰ দল লৈ যাব বুলি চিঠি প্ৰেৰণ কৰিছে….হুঁচৰি দলৰ মাননী ‘ফিক্সড’৷

এইবোৰ অংকত ৰমণী ভাল৷

চহৰখনৰ আঢ্যৱন্ত মানুহৰ তালিকাত চলিহাহতঁৰ ঘৰখনো লেখত ল’বলগীয়া৷ চাহ বাগান, চাৰি-পাঁচখন নাইট চুপাৰ বাচ, ট্ৰাক, চহৰৰ মাজমজীয়াত এখন বিয়াৰ বজাৰ হোৱাকে খুলি ৰখা প্ৰকাণ্ড গেলামালৰ দোকানখনৰ মালিক চলিহা৷ ধনী যদিও গপ ভেমৰ নামমাত্ৰও নথকা চলিহা ডাঙৰীয়া এজন সৰবৰহী লোক৷

এই চলিহাৰ ঠিকনাতে বিহু হুঁচৰি দলৰ এখন চিঠি আহিল৷ হুঁচৰি দলৰ মাননী ‘ফিক্সড’৷ মাত্ৰ ১০,০০০ টকা৷ চিঠিখন পঢ়ি চাই চলিহাই কোনো প্ৰতিক্ৰিয়া প্ৰকাশ নকৰিলে৷ সময়ত চলিহাৰ পদূলিত হুঁচৰিৰ দল৷ চলিহাৰ ভলভলীয়া কথা,

: ১০,০০০ টকা মাননী দিয়া যাব, কিন্তু চুবুৰিটোৰ ধনী দুখীয়া প্ৰতিঘৰ মানুহৰ চোতাল হুঁচৰিয়ে গৰকিব লাগিব৷