মইবৰ – প্ৰণীতা গোস্বামী বৰঠাকুৰ
“চকু মুদা কুলি”ৰ দৰে
থাকিলোৱেই যেনিবা মই,
“চল চাই কঠিয়া পৰা”ত
ওস্তাদ কিয়নো তই !!
“বাটৰ কচু গাত ঘঁহি”
ভাল নাপাওঁ মই,
“নলগা জেং” ত সোমাবলৈ
যাৱনো কিয় তই!
বেছি পয়মাল দেখিলেই মই
“টুপাই বুৰ মাৰো”,
“চুঙা চাই সোপা”টো মাৰিব
নাজান কিয়নো বাৰু!
“আপোন ভালেই জগত ভাল” বুলি
আত্মতুষ্টি কৰোঁ
“গছত উঠাই গুৰি কাটিব”লৈ
অলপো কেৰেপ নকৰোঁ।
“কটা ঘাঁত চেঙাতেল” দি
কি যে লাগে মজা,
“জ্বলা জুইত ঘিঁ” ঢালি
তাতোকৈ সুখৰ মেলা ।
“আঠুৱা চাই ঠেং মেলি”বলৈ
জ্যেষ্ঠজনে কয়
বণিজলৈ গ’লেহে গমিবি
“অধিক মাছত বগলী কণা” হয়।
“নাও বুৰিলেও টিঙৰ পৰা নানামো”
ইজ্জত অথলে যাব,
“কণা হাঁহক পতান” দিয়াত
মোৰ দৰে কোনো নোলাব।
“কিনা হাঁহৰ ঠোঁটলৈকে মঙহ”
কিয়নো নুবুজ তই,
“পৰৰ পালে জ্বৰৰ গাৰে খাব”লৈ
লাজ নকৰো মই ।
“মাছৰ তেলেৰে মাছ ভাজিব”লৈ
শিকাব নালাগে মোক,
“আনৰ মূৰত কঁঠাল ভাঙিলে”হে
গুচিব পেটৰ ভোক ।
“চোৰ গ’লে বুদ্ধিতো দিয়া”ত
বৰ পাকৈত তই
“চৰুক সুধি চাউল বহাব”
নাজানোহে যেনিবা মই!
“গছত কঁঠাল ওঁঠত তেল” ঘঁহি
বহি নাথাকিবি তই,
“দূৰৈৰ পাহাৰ দেখাতহে শুৱনি”
জ্ঞানী জনে কয়।
“অচিন কাঠৰ থোৰা নলগাবি”
পাছত আহুকাল পাবি,
“বেজৰ নাকত খৰে খালে”হে
কথাষাৰ বুজি পাবি।
থ থ হেৰৌ কিয়নো বাৰু
“শালকে শিঙিয়ে হাঁহ”
“হোলোঙাৰে কাণ খজুওৱা” কথাবোৰ
নকবিচোন ৰাইজৰ আগত।
■■
8:45 am
Baidew Fokar jujonar utkristo xongjug.
6:14 pm
বহুত ধন্যবাদ উৎসাহ দিয়া বাবে।
11:08 am
বাইদেউ, বঢ়িয়া ।
6:15 pm
ধন্যবাদ মানস।
1:18 pm
এনেকা বান্ধা কবি জেইছা কবিতা আৰু মাংটা ।
6:16 pm
হা হা– উৎসাহ পালোঁ। অশেষ ধন্যবাদ।
4:16 pm
বঢ়িয়া বাইদেউ, ভাল লাগিল পঢ়ি
6:16 pm
হা হা– উৎসাহ পালোঁ। অশেষ ধন্যবাদ।
6:17 pm
অশেষ ধন্যবাদ ৰিন্তু।
4:18 pm
হা হা, খুব ভাল লাগিল দেই পঢ়ি বাইদেউ
6:20 pm
ধন্যবাদ।
6:55 pm
বৰ ধুনীয়া দেই প্ৰনীতা ৷ ফকৰা যোজনাৰ লগত মিলাই দিয়া সামাজিক বাৰ্তাটো খুব পচন্দ হ’ল ৷ লিখি থাকিবা ৷
8:59 am
ধন্যবাদ দাদা। উৎসাহ পালো।
8:30 pm
বৰ মজা লাগিল বাইদেউ …………
9:00 am
ধন্যবাদ।
9:58 am
সুন্দৰ বা৷ ভাল পালো পঢ়ি৷